Lawngtlai MJA-in kawng siam enfiah

MJA, Lawngtlai District member-te chuan nimin khan Lawngtlai bul Chawnhù kawng aṭanga agriculture link road siam mek a hmunah an tlawh a; hna ṭha lo an hmuhte chu a nih dan tura siam ngei an phût thu an sawi.

Lawngtlai MJA-te hi an president Elvis Lalthangzuala hoin an thawk chhuak a; kawng an enfiah chu Greater Lawngtlai Water Supply Scheme Treatment Plant panna kawng a nih nghal thu te, km. 1-a thui niin, RCC flooring tura tih a nih thu te, a siam nan NABARD hnuaia Rural Infrastructure Development Fund aṭangin Rs 55,38,766 ruahman a nih thu leh, hna thawktu chu ACE Design, Building & Consultancy Services, Ramhlun North an nih thute an tarlang.

MJA member-te chuan kawng metre 800 vel siam zawh thawkhat tawhah ruahtuiin a chung lam a tihchhiat nia lang hmun eng emaw zatah an hmu a, hna enkawltu Agriculture department aiawhte thil awm dan an zawtfiah. Hna viltute chuan hna ṭha lo laite chu siam ṭha leh vek tura an hriattir tawh thu an lo hrilh a ni.