Hnam puanzar kengin kawng zawh a ni

Independence Day thleng tur pualin tun hnaiah Mizorama district hrang hrangah hnam puanzar kenga kawngzawh, Har Ghar Tiranga Yatra buatsaih a ni.

Har Ghar Tiranga kawngzawh hi nimin khan Siahaah buatsaih a ni a; district bawrhsap VL Hruaizela Khiangte hoin sorkar department hotute leh zirlaite an tel a, mi 700 chuangin Siaha Vaihpi khelmual aṭanga Bazar Traffic Point thleng hnam puanzar kengin kawng an zawh.

Serchhipah pawh nimin khan Tiranga Yatra buatsaih niin, sikul leh college zirlaite leh mipui ṭhahnem tak an tel. Kawngzawh hi Serchhip College pêng leh P&E Veng Mini Park aṭanga ṭan a ni a, Serchhip DC pisa tualah intâwk khawmin, khârna inkhawm buatsaih a ni. Khârna inkhawmah hian bawrhsap Paul L Khuma leh SP Gavit Gogna ten thu an sawi. Nimin vek khan Serchhip DC Hall kawtah leh IPR Conference Hall-ah Independence Day vawi 79-na pualin Photo Exhibition buatsaih a ni bawk.

Nimin vêk khan Saitualah Har Ghar Tiranga kawngzawh huaihawt niin, zirlai ṭhahnem tak an tel a, Saituala CI kâwn leh Keifang kâwn aṭanga kal ṭanin, Keifang Centenary Complex-ah an intâwk khawm. Saitual SDC J Lalawmpuia'n Har Ghar Tiranga chungchang leh India hnam puanzar chanchin a sawi.

Champhaiah chuan August 11, Thawhṭanni khan Har Ghar Tiranga pualin bike rally buatsaih a ni a, district bawrhsap Mohammad Aaquib-a'n a vailiam. He hunah hian Buffalo Riders, 04 Riders leh 04 Girls member-te leh sorkar department hrang hranga thawkte an tel a; two wheeler hmangin hnam puanzar tárin New Champhai aṭangin Kahrawt Volleyball Court thleng an tlan a ni.

August 11 vek khan Kolasib DC pisa tualah Har Ghar Tiranga campaign buatsaih a ni a; Tiranga Yatra leh Har Ghar Tiranga thutiam sawi rual a ni. Sorkar hnathawk te, Mizoram Ex-Servicemen League member-te leh zirlaite an tel a; SDC Lalrinchhani'n kaihruaiin, additional DC B Malsawmtluangi'n thu a sawi.