Inbán-elh chakte Minister-in a lawmpui

Minister of state Prof. Lalnilawma chuan nimin khan pisaah a bial chhunga Thingsulthliah khaw mi Ngurthanzauva Sailo leh Lalawmpuia, tun hnaia inbán-elh (arm wrestling) intihsiaka medal late thingpui a inpui a, lawmpuina pawisa a hlân.

Prof. Lalnilawma chuan, Mizo ṭhalaite ruihhloin a tibuai nasa a, ṭhalaite ruihhlo laka an fihlim theih nan sorkarin theihtawp a chhuah mek thu a sawi a, "Sports leh zirna lamah ṭhalaite kan ṭan lehzual a ngai. Sports leh zirna hi ruihhlo do leh ṭhangtharte ruihhlo laka venna ṭha tak pakhat a nih avangin rilru leh tih tak zeta ṭhalaite kan kal chuan ṭhangthar lo awm lehzel tur rilruah ruihhlo hnualsuatna hi nasa zawkin a intuh dawn a ni," a ti.

Minister hian ruihhlo do chu thil hautak tak a nih avangin Mizoram mipui an ṭan rual a ṭul thu a sawi a; infiamna leh zirna lamah tun aia nasa zawka kal turin ṭhalaite a chah bawk.

Ngurthanzauva Sailo hian World Police & Fire Games 2025, Birmingham, Alabama, USA-ah gold medal (bán dinglam) leh silver medal (bán veilam)-ah a la a; Lalawmpuia hian National Arm Wrestling Championship, 2025, Kerala-a neihah silver medal a la a ni.