Lungleia clinic leh laboratory-te endik rêl

Lunglei additional DC Zoramdini kaihhruaiin nimin khan a pisaah damdawi-in, clinic leh laboratory-te dan anga chhinchhiah leh vil tura din District Registering Authority (DRA) an ṭhukhawm a; Lunglei district-a private clinic leh laboratory-te endik an rêl.

Ṭhutkhawmah hian Lunglei district-a damdawi-in leh clinic zinga provisional registration tihnun (renew) ngaite chu hriattir nawnna (reminder) thawn an rêl a; laboratory-te chu permanent registration tih ngai an nih avangin October 12, 2025 ral hmaa tifel tura hriattir ni se, an ti.

The Clinical Establishments (Registration and Regulation) Act, 2010 hnuaia la lang lo, clinical establishment hnuaia rìn luh ṭul turte chu department lamin lo zir chiang se, an ti a; clinic leh laboratory-te endik an rêl. Damdawi-in thlì leh bawlhhlawh (bio-medical waste) sâwngbàwl leh thehthang chungchangah hmunhma ṭha zawk siam a nih theih nan hmalak dan tur an rel bawk.

Meetiong-a tarlan danin, Lunglei district-ah hian sorkar hriatpui clinical establishment 51 a awm mek a; chu'ng zinga 15 chu sorkar enkawl district hospital, community health centre leh primary health centre-a mite a ni a, a dang 36 chu mimal din (private) damdawi-in, clinic leh laboratory-te a ni.

Sorkar laipuiin The Clinical Establish-ments (Registration and Regulation) Act, 2010 a siam behchhanin Mizorama clinical establishment-te chhinchhiah, khuahkhirh leh vil zuina tur The Mizoram Clinical Establishments (Registration and Regulation) Rules, 2014 siam a ni. He dan hnuaiah hian damdawi-in, clinic leh laboratory-te chu DRA-ah an inziah lut vek tur a ni a, inziak lut turin a him chin leh pawm theih chin (minimum standard) an phâk ngei a ṭul.