Covid-19 vangin inkhâwm lo rei tawh Pathianni vawi 43 inkhawm tawh lo

January 3 kha kum 2021-a Pathianni hmasa ber a ni a, Covid-19 hripui léng laka invenna atan sorkarin sakhaw thila punkhawm a la remtih loh avangin kohhrante an inkhawm thei lo. January 3, Pathianni kha Pathianni bika inkhawm theih loh vawi 43-na a ni.

Kum tin January thlaa Pathianni hmasa hi kohhran páwl hrang hrangah sunday school hming ziah ní a ni tlangpui a, mahse, sorkarin inkhawm a la remtih loh avangin mipui náwlpui inkhawm a la awm lo a, sunday school hming ziah theih a la ni lo.

Mizoram Synod chuan sunday school hming ziah chu inkhawm theih hun huna tih ṭan turin an ti nia thu dawn a ni. Hetih lai hian, pastor/minister insawn turte insawn a hun ṭan a, Pathianni kal ta khan biak-in eng emaw zatah chuan pastor chhuak turte thlahna hun hman a ni.

Mizoram hmun tam berah chuan Pathianni bikah March 15, 2020 kha biak-ina inkhawm hnuhnun ber a ni a; March 22, 2020-ah India ram pumah Janata Curfew neih niin, chuta ṭang chuan nimin thleng khan kohhran inkhawm a awm tawh lo a, January 3, 2021 kha March 22, 2020 aṭangin Pathianni vawi 43-na a ni.

Pathianni ni loah chuan March 18, 2020, Nilaini zanah kohhran eng emaw zat an la inkhawm a, chumi hnu lamah erawh chuan kohhran inkhawm a awm tawh lo.