Chak lehzuala hna thawk turin MP (LS)-in BRO hotupa a ngen

Lok Sabha MP Richard Vanlalhmangaiha chuan August 12, Thawhlehni khan Border Road Orga­ni­sation (BRO) Head­quar­ters-ah director general Lt Gen. Raghu Srinivasan a kâwm a; Mizorama BRO enkawl kawng­te leh hna hrang hrang an thawh mekteah chak lehzuala hma la turin a ngen.

Richard Vanlal-hmangaiha chuan, PUSHPAK Project hnuaia lei (RCC bridge) dawh mek, chawlh lailâwkte chu chhunzawm vat a nih theih nana hma la turin BRO DG a ngen a; Lawngtlai, Siaha leh Champhai district-a ram lak (land acquisition) man la pek lohte a rang lama pek a nih theih nan hma la tur leh, Siaha district-a Tipa-Laki-Lope-Lopu (LTTT Road) kawng laih meka additional compensation cheng vbc. 82 tâng mek chu tifel thuai turin a ngen bawk.

Lt Gen. Raghu Srinivasan chuan, Mizorama BRO-in hna an thawh mekte leh la thawh turte chu a ṭha thei ang ber leh rang taka thawh a nih theih nan hma a lak nghal tur thu leh, ram lâk leh zangnadawmna la pek loh chungchang pawh an ngaihtuah nghal tur thu a lo hrilh a ni.