Education Minister-in sawi lâwk loin Aizawl chhunga sikul pathum a tlawh

School Education minister Dr Vanlalthlana chuan nimin khan sawi lawk loin Aizawla sikul pathum - ITI High School (adhoc aided), Salem Veng Primary School-I leh Mizoram Institute of Comprehensive Educa-tion (MICE) te a tlawh.

ITI H/S hi in sak mek, la zawh loh, hna chawlhsan rih a ni a, a sak nan cheng nuai 64.5 ruahman a ni. Headmaster leh zirtirtute chuan harsatna an neihte leh an hmabakte Education Minister an lo hrilh a, a hmunah enho nghal a ni.

Minister Dr Vanlalthlana hian Salem Veng P/S-I tihtawp tawh hmunhma a en a; sikul building hnuai lam kawng àn chu khawtlangin bazar atan an hmang mek a, a chung lam chu post office leh thil dang atan hman a ni thung.

Education Minister hian Tuikual North-a MICE a tlawh bawk a, principal Lalrinkima leh thawktu dangte'n an lo dawngsawng. Classroom leh smart classroom, ICT room, library leh vocational education classroom-te a tlawh kual a; hmeichhe naupangte'n mahni inven dan (self defence) an zirte an lo entir bawk.

School Education Minister hi School Education secretary David Lalthantluanga, director Angela Zothanpuii leh hotu dangte'n an ṭawiawm a ni.