KHAWTHLIR

KṬP-in thisen pe

KṬP, Bethlehem Venglai Branch chuan an branch din champha pualin nimin khan an kohhran hall-ah Synod Hospital tan thisen unit 48 an pe a, petute mipa 39 leh hmeichhia pakua an ni.

AR Tiranga Run

Assam Rifles chuan Independence Day 2025 pualin nimin khan Aizawlah Tiranga March leh Tiranga Run an buatsaih. Zokhawsang leh Zemabawk inkarah hnam puanzar kengin hun hman a ni a; Tiranga Run-ah hian AR sipaite bakah tualchhung (civil) mi 30 an tel a, Tiranga March-ah sipai 100 vel an tel bawk. Assam Rifles hian August 12, Thawhlehni khan Zokhawsang aṭanga Tuirial Airfield thlengin Har Ghar Tiranga Bike Rally an huaihawt bawk a, AR sipaite bakah tualchhung mite an tel a ni.

Ngawr natna inzirtir

State TB Cell chuan nimin khan Seventh-day Adventist Kohhran hruaitute tan Seventh Day Tlanga Seventh-day Adventist committee room-ah ngawr (TB) natna chungchang inhrilhfiahna an buatsaih. Zirhona hi SDA executive secretary Pastor Rodingliana'n a kaihruai a, state TB officer Dr Zochhuanawmi'n TB natna chungchang zirtirin, TB donaa sorkar leh kohhran hmalakho theih dan turte a sawifiah a ni.

Minister-in hmanpui

Social Welfare minister Lalrinpuii chuan nimin khan Hyve Aizawl City Hall-ah Zo Inspiration Foundation (ZIF) buatsaih Free Education Programme (FEP) Parents Meet cum Website & MIS Launch programme a hmanpui a, ZIF website leh management infor-mation system a hawng.

Pani, Pahar kalpui

Mission Foundation Movement chuan an project pakhat, ‘Mobius Young Climate Leaders for Himalayan Development, North East India’ kaltlangin Aizawla zirna-in 16-ah Cambridge University kutchhuak ‘Pani, Pahar: The Water Curriculum’ zirna an kalpui ṭan. He zirlai hi Cambridge University-a Department of Geography leh The Heart Education Advisers te duan a ni a, tui leh leilung leh a chhunga awmte chungchang zirna a ni.

DGP leh NGOCC

Mizoram DGP thar Sharad Agarwal chuan nimin khan a pisaah NGO Coordination Committee hruaitute a kawm a, Mizoram chhung thil chi hrang hrang a zawh bakah a sawipui. DGP hian NGO hruaitute chu police-te ṭha taka thawhpui ṭhin turin a ngen a ni.

LMC chhiarpui

Lunglei Municipal Council (LMC) leh Directorate of Economics & Statistics ṭang dun chuan LMC huam chhunga chhiarpui (demographic census) buatsaih tura chhiartu (enumerator) turte tan Lunglei Convention Centre-ah nimin khan training an buatsaih. LMC chhiarpui hi August 18 - September 15, 2025 chhungin neih tum a ni a, October 27, 2025-ah chhiarpui tlangzarh hman beisei a ni.