Software thar vanga electric bill-a harsatna awm tihfel a ni ṭêp tawh

Nimin khan Power & Electricity department hotute chu an minister F Rodingliana hoin a pisaah an ṭhukhawm a, August 1, 2025 aṭanga electric bill software thar Mizoram puma hman chungchang an sawiho. Software thar hman ṭan tirh lama electric bill chungchanga harsatna awmte tihfel thuak a nih tawh thu tarlan a ni.

Ṭhutkhawma tarlan danin, electric bill kalphung (system) tharah hian consumer-te'n bill pekna hmun pan kher ngai tawh loin, mobile application (PEDM) hmangin awmhmun aṭangin bill pek theih a ni. Hei hian electric hmangtu consumer-te tan nasa takin awlsamna a siam a, department tan pawh inrelbawlnaah awlsamna a thlen bawk.

He tih dan thar avang hian electric bill hmuh ṭhat zawk beisei a ni a; online hmanga bill siam a nih tak avang hian consumer-te pawhin electric bill a hun takah an dawng ang a, bill hmuh loh leh hmuh tlai a awm tawh lo ang.

System thar hman a nih tâk avanga collection efficiency leh billing efficiency lama hmasawnna hian Mizoramin harsatna a tawh ṭhin - Aggregate Technical & Commercial Loss chungchangah pawh nasa takin hma a sawn phah dawn. Paper hmanga electric bill tam tak print ngai ṭhin pumpelh a nih dawn avangin sorkarin sum eng emaw zat a hum thei bawk dawn a ni.

Ṭhutkhawmah hian power supply khaihlak ṭhin chungchang sawiho a ni a; fûr zualpui a reh chhoh ṭan avangin RDSS hnuaia hnathawh hrang hrangte ngawrh lehzuala kalpui ṭan a nih tak thu an sawi. RDSS hnathawh mekte hi mipui vantlang tana hmasawnna hnathawh kal mek a nih avangin loadshedding kalpui ṭhin chu hrethiam a, dawhthei taka tuar hram hram turin mipui an ngen bawk.