Bualte leh Ṭhualṭhu inkara leimin enfiah

Lunglei District Disaster Manage-ment Authority (DDMA) chairman Navneet Mann, bawrhsap leh DDMA hnuaia Joint Inspection Team chuan August 12, Thawhlehni khan NH-2 kawngpui, Bualte leh Ṭhualṭhu inkara lei minna hmun an enfiah.

Lunglei Bawrhsap leh DDMA Joint Inspection Team ten leimin an enfiahnaah hian Lunglei BDO Grace Lalremdiki Sailo, PWD, Power & Electricity, PHE, Geology & Mining leh IPR hotute an tel a; kawng enkawltu NHIDCL leh hna thawktu BRN Infrastructure aiawh te, YMA Sub-Headquarters Lunglei hruaitu te, Bualte leh Ṭhualṭhu VC leh YMA hruaitute an tel bawk. Lei minna hmun an enfiah hnuah Bualte VC House-ah hmalak zel dan tur sawiho a ni.

Navneet Mann chuan, leiminin harsatna a thlen chu mihring thunun theih piah lam a nih thu sawiin, tuna tih theih chu harsatna kara thawhho leh inṭanpui tawn a nih thu a sawi a; Bualte leh Ṭhualṭhu khawtlangin khualzin tangkhangte theihtawp chhuaha an lo pui ṭhin chu ropui a tih thu a sawi bawk.

Lunglei aṭanga thu dawn danin, leiminin NH kawngpui a hnawh pin chu nimin zing khan lirthei kal theiha nawr tlang a ni a, zing dar 8 velah lirthei tangkhangte kaltir niin, chawhma dar 10 velah an chhuak kim. Lei min leh nghal mai thei a la awm nual a, ruah a sûr chuan kawng ping leh nghal thei reng a ni bawk.

Bualte leh Ṭhualṭhu inkarah hian August 2, 2025 khan nasa takin lei a min a, kawngpui a hnawh ping a, lirthei leh khualzin eng emaw zat an tâng. NHIDCL hnuaia kawng siamtu BRN Infrastructure-in August 4 tlai lamah lirthei tê kal theihin an nawr tlang a, a hnuah lei a min belh zel avangin kawng ping leh tlang a inchhâwk deuh reng a ni. Lei minna hmun hi Geology & Mining department mite'n August 4, 2025 khan an enfiah tawh.

NHIDCL hotute chuan, Lunglei district-a kawng an enkawl zinga leimin nasat theihna hmun 13 an thehluh zingah Bualte dáia tuna lei minna lai hi a tel tih sawiin, an hmunpui aṭanga mithiam zawkte'n an zir chian tur thu an sawi.

Lunglei DC hoa sawihonaah hian, lei minna lai leh a chhak lam leilung laboratory-a endik turin Geology & Mining leh BRN Infrastructure ten August 18, 2025 ral hmain lei sample lain, chawlhkar khat chhungin endikna result DC-ah theh lut se, tia thu dah a ni.