Revenue online tax payment tlangzarh

Kolasib SDO (Sadar) H Lalramliana, settlement officer ni bawk chuan nimin khan Kolasib Land Revenue & Settlement office-ah online kaltlanga LRS department hnuaia chhiahte pekna tura siam, 'Online Tax Payment System' a tlangzarh. Kolasib LRS office hian August 2024 aṭanga kumin August thla thlengin sorkarah chhiah chi hrang hrang cheng nuai 193 an chhung lut tawh.

H Lalramliana chuan, LRS department hnuaia online tax payment system siam a ni ta chu hmasawnna ropui tak a nih thu a sawi a, "Online hi mipui tana awlsam zawkna tura siam a ni a, chhiah pe tura office kal kher ngai loin mahni in aṭangin him leh felfai takin chhiah a pek theih tawh dawn a, receipt-te pawh chiang taka inchhinchhiah nghalna a ni," a ti a; online tax payment chungchanga hriatthiam loh nei tan LRS office-ah engtiklai pawha zawhfiah theih a nih thu a sawi.

Tarlan danin, Kolasib Land Revenue & Settlement office hian August 2024 leh August 2025 chhungin leiman (chhiah) khawnna, pass khul chhuahna leh chhiah dangte aṭangin sorkarah cheng nuai 193 chuang an chhung lut tawh a; ram pass 375 ziak lutin, pass 319 an tinung thar (renew) bakah, ram 511 an teh fel tawh a ni.