MPCC hruaitute'n Serchhip an tlawh

MPCC hruaitute chuan nimin khan MLA by-election buatsaihna tur bial Serchhip biala khaw hrang hrang Serchhip, Thenzawl leh Buangpui khuate an tlawh.

Serchhip biala Congress hruaitute nen an inkawmnaah senior leader PC Zoram Sangliana chuan anti defection law hnuaiah chuan ni chu ni, ni lo chu ni lo a nih mai thu sawiin, "Dan bawhchhia kan khawngaih dawn a nih chuan traffic rules bawhchhiate pawh ngaidam vek ang u," a ti.

PC Zoram Sangliana chuan MNF sorkarin sum harsatna namen lo a tawk nia sawiin, " Congress sorkar sum khawlsain bul an ṭan a, kum khat chhungin an hmang zo," a ti a, sorkar chuan a hnathawk hlawh an pe ngawr ngawr a, a chângin an bat ṭhen sak thu a sawi.

Thusawitu dang MPCC secretary PC Laltlansanga chuan Covid-19 avanga Hrangthanga, Thenzawl a thi chu pawi a tih thu sawiin, "Mizoram sorkarin Bihar inthlanah police a tirh loh tur thu a sawi hnuah a tir lehsi a, vanduaithlaktakin hripui rawn kai haw an awm ta nual a ni," a ti.