BJP-in Two Wheeler Rally huaihawt

Har Ghar Tiranga campaign kal zelah BJP, Mizoram chuan nimin khan Aizawlah Two Wheeler Rally an huaihawt a, Mizoram BJP president Dr K Beichhua, MLA-in Sikulpuikawnah a vailiam.

Two Wheeler Rally-ah hian mi eng emaw zat an tel a, lirthei ke hnih neiah hnam puanzar zarin Sikulpuikawn aṭanga Chanmari kâwn thleng an tlan a, Upper Republic-a BJP pisaah an tàwp a ni.

Dr K Beichhua chuan, Har Ghar Tiranga pualin Two Wheeler Rally an buatsaih satliah lo tih sawiin, "India ram hmun hrang hranga cheng te, chhim tâwp aṭanga Hmar tâwp thlenga chengte kan inpumkhatzia lantirna a ni tih kan hriat a ngai," a ti.

Mizoram BJP Presi-dent chuan, "British laka zalenna kan hmuh hun laia thâ leh zung thawhtute kha vawiinah chuan kan zingah awm tawh lo mah se, keini la damte hi kan mi hmasate aiawha India ram ropui tak hi enkawl chhunzawm tura awm kan ni tih kan hriat thar a ngai," a ti a; Mizoramin state dangte ruala hmasawnna kawng a zawh ve zel theih nan inlungruala hma lam pan a ṭul thu a sawi.