NDMA hotute Champhaiah an kal

National Disaster Management Authority (NDMA) hotute chuan nimin khan Champhai an tlawh a; DC conference hall-ah Champhai leh Khawzawl District Disaster Management Authority (DDMA) hotute kâwmin, chhiatna laka inven dan turte an sawipui.

Inkawmhonaah hian NDMA senior consultant Ranjan Kumar Borah-a'n NDMA hmalakna te, Disaster Management Act siamṭhat a nih dan te, district aṭanga international thlenga chhiatna thleng tur ven nana thawhhona neih dan turte a sawi.

Champhai DDMA aiawhin SDC Lalchhuanawma Ralte leh Khawzawl DDMA aiawhin SDO (Sadar) Suvigya S. Chandra ten an district hmalakna leh mamawhte an sawi a; NDMA joint advisor Dr SK Jena kaihhruaiin sawihona hun leh zawhna leh chhanna hun hman a ni.

NDMA hotute hian vawiinah Champhai Vengsang, Bethel Veng leh NH-06 kawnga leiminte an en dawn a ni.