Minister-in hnathawh mekte a enfiah

Minister of state Robert Romawia Royte chuan nimin khan a bial, Aizawl East-II chhunga Chite Veng, Armed Veng South leh Armed Venga UDPA department hnuaia SEDP hmalakna leh Aizawl Smart City, PWD leh SYS depart-ment hnuaia hnathawhte a enfiah.

Robert Romawia chuan, Smart City hnuaia cheng nuai 700 sénga Chite football ground tilian a, phûl lem phahna tur chu Aizawl Smart City hotute nen an enho a; fûr ruahtui tlak hmaa a ruhrel (structure) thawh zawh hman dan turte an sawiho. SEDP sum nuai 10 hmanga Chite Veng chung lam inkalpawhna siam mek pawh a hmunah tlawhin, tualchhunga hna thawktute chu hna ṭha taka thawk zui turin a chah.

Minister chuan, SEDP sum nuai 30 hmanga Armed Veng South-a kawngpui thar siam mek leh MLA fund hmanga inkal pawhna kawngpui thar siam mek te, 1st MAP MI Room building sak mek te, Mizoram State Sports Council hnuaia 1st MAP Football Ground-a hna thawh mekte a tlawh. Khelmual sîra mipui ṭhutna tur a chhâwng siam ṭan mek leh phûl lem phahna tura hnathawhte chu chak zawka kalpui dan tur department hotute a sawipui a ni.

Robert Romawia Royte hi Aizawl Smart City, UDPA, PWD, Home leh Sports & Youth Services department hotute'n an ṭawiawm a ni.