AR-in ruihhlo do beihpui thlâk ṭan

Assam Rifles chuan kumin chhung hian Mizoram pumah ruihhlo do beihpui an thlâk dawn a, hma an la mek. Anti Drugs Campaign hi January 2, 2021 khan an hawng a, a bul ṭanna atan ruihhlo do tura thutiamna lâkna hun an buatsaih.

Thutiam lak inkhawm hi Aizawlah chuan 46 AR hmuna Loch Hall-ah hman a ni a; Assam Rifles 23 Sector DIG Brig. Digvijay Singh chuan, ruihhlo ṭhat lohna mipui hriattir an nih chuan khawtlangah rah ṭha a chhuah ngei a beisei thu a sawi a, "Mizo mipui tlem dan ngaihtuahin, Mizoramah ruihhlo vanga thi an tam hle a ni," a ti.

Brig. Digvijay Singh chuan, Mizoram chu ruihhlo tawlhrûkna kawng, Golden Triangle-a awm a nih thu a sawi a; Mizorama ruihhlo lut titawp turin AR-in theihtawp an chhuah tur thu a puang a ni.

Assam Rifles hotute sawi danin, ruihhlo do beihpui an thlaknaah hian huam bik an nei dawn lo a, mipui zawng zawng a huam dawn. Anti Drugs Campaign hi thawh lia kalpui tur a ni a; khaw hrang hranga AR awmna hmunah ruihhloin a la tihbuai loh naupangte ruihhlo hlauhawmna leh ṭhat lohna zirtir a ni ang.