LADC CEM V Zirsanga'n fiah a nih hmain CEM aṭanga bânna a thehlut

Guwahati High Court (GHC) thutlukna angin Lai Autonomous District Council (LADC) chief executive member (CEM) V Zirsanga'n thlâwptu a ngah leh ngah loh nimin khan finfiah (floor test) tur a ni a, fiah a nih hmain V Zirsanga'n CEM aṭanga bànna a thehlut.

CEM V Zirsanga'n thlawptu a ngah leh ngah loh fiah tur hian nimin chawhma dar 10:30 khan LADC session koh a ni a, fiahna hun hman a nih hma chawhma dar 10-ah V Zirsanga'n CEM aṭanga bànna lehkha Governor hnena a thlen tur chu LADC chairman T Zakunga hnenah a thehlut. V Zirsanga'n bànna lehkha chu LADC Chairman-in member-te hriatah a chhiar chhuak a ni.

LADC Chairman chuan, CEM V Zirsanga a bàn tâk avang hian CEM-in thlâwptu a ngah leh ngah loh finfiah a ngaih loh thu leh, V Zirsanga kaihhruai sorkar chu paih thlak a nih tak thu a sawi. Hemi hnu hian LADC session pawh tiam chin awm loin Chairman-in a titawp nghal.

V Zirsanga hi LADC CEM atan February 24, 2025 khan ruat niin, February 27-ah CEM atan lak luh a ni a, Governor Gen. VK Singh-a'n ni 30 chhungin House-ah fiah turin ti mah se, fiahna hun buatsaih a ni lo. V Zirsanga hi CEM aṭanga dan anga paih awm chuang loin Governor-in BJP MDC N Zangura chu CEM atan a ruat a, May 8, 2025 khan CEM atan lak luh a ni.

Governor thutlukna hi V Zirsanga chuan Gauhati High Court-ah a khing a; High Court chuan August 8 khan thutlukna siamin, Governor-in LADC CEM atana N Zangura a ruatna chu a ṭhiat a, V Zirsanga'n sorkar siam tura thlâwptu a ngah leh ngah loh chawlhkar hnih chhunga fiah turin a ti bawk.

Hetih lai hian, Mizoram BJP president Dr K Beichhua chuan nimina Partition Horrors Remembrance Day an hmannaah LADC chungchang a sawi a, "ZPM CEM-in fiahna a paltlang hmaa bànna a submit tâk avangin BJP kaihhruai sorkar ṭha tak kan nei thuai dawn a ni," a ti.