NQAS-ah Ṭawipui South PHC tling

India rama sorkar damdawi-in ṭha tehna National Quality Assurance Standards (NQAS)-ah Ṭawipui South Primary Health Centre (PHC) a tling thar a; heti hian Mizoram sorkar damdawi-in 42-in NQAS national certificate an hmu tawh.

National Health Mission, Mizoram mission director Dr Lily Chhakchhuak tarlan danin, NQAS national certificate hmu tur hian National External Assessment hmachhawn a ngai a, 70% hmuh a ngai. Ṭawipui South PHC hian 84.78% hmuin, NQAS national certificate a hmu ve ta a ni.

Heti hian Mizorama sorkar damdawi-in 42-in NQAS national certificate an hmu tawh a, sorkar damdawi-in 19-in state level certificate nei tawhin, chu'ng zinga pahnih chuan national certificate result an nghak mek. PHC bikah Mizorama PHC 29-in NQAS national certificate an hmu tawh a ni.