Ramria police duty-te tlawh

August 13, Nilaini zan leh nimin khan adviser to chief minister (political) Lalmuanpuia Punte chuan Assam leh Mizoram ramria police duty-na hmunte a tlawh.

Lalmuanpuia Punte hian home minister K Sapdanga remruatna angin ramria police duty-te chu hrilh lâwk loin a tlawh a; Assam sorkarin an state chhunga dan loa Bangladesh mi leh sa a hnawh chhuahte Mizorama an rawn luh lohna atana an hmalak dante a en a ni.

August 13 zan khan Adviser to CM hian Bairabi Police Station leh rel chawlhhmun te, Assam ramri bula duty post te, ILP endikna leh pek chhuahna hmunte a tlawh a, police-te mamawh hrang hrang leh hmunhma bakah thawktu an indaih em tihte a enfiah.

Niminah Vairengte, Phaisen leh Saiphai, ramri hrûla police duty leh hnathawh dan a enfiah leh a; Bairabi khawtlang hruaitute leh tlawmngai pawl YMA leh MZP hruaitute nen an inkâwm bawk.