KHAWTHLIR

Thisen pe

Nimin khan Govt. Aizawl College chuan an hmunah thisen pek rûnpui huaihawtin, Civil Hospital, Aizawl tan thisen unit 141 an pe a, petute mipa 121 leh hmeichhia 20 an ni. Higher and Technical Education Mizoram (HATIM) NSS leh Red Ribbon Club pawhin Independence Day 2025 pualin nimin khan an hmunah Civil Hospital, Lunglei tan thisen 125 an pe a, petute mipa 85 leh hmeichhia 40 an ni.

IIS-a tling lawmpui

MNF senior vice presi-dent Dr R Lalthangliana chuan nimin khan tun hnaia Indian Information Service (IIS)-a tling Andrew Lalchhandama, Nursery Veng, Aizawl hnenah chawimawina leh lawmpuina a hlan. Chawimawina hlanna hun hi DDK pisaah neih a ni a; Dr R Lalthangliana chuan, Andrew Lalchhandama chu kum 43 hnua Mizo zingah IIS inziak tling leh hmasa ber a nih thu sawiin, "Mizo ṭhalaite leh lehkha zir mekte tan entawn tlak leh chona nasa tak a ni," a ti.

Drug awareness

Lunglei Police chuan nimin khan Leitlangpui Higher Secondary School-ah ruihhlo ṭhat lohzia leh ruihhlo laka fihlim theih dan tur zirtirna, Awareness on Drugs Abuse an buat-saih a, zirlai 240 chuang an tel. Resource person J Lalmuankima, Lunglei SP-in ruihhlo chungchanga hriat tur pawimawhte a sawi a; ruihhlo laka fihlim tur leh ruihhlo donaa theihtawp chhuah tura intiamna ‘Signature Campaign’ buatsaih a ni bawk a, zirlai ṭhahnem takin intiamna an ziak.

Silver Jubilee Run

Zemabawk Higher Secondary School chuan kum 25-na, silver jubilee an lawm tur bul ṭan nan nimin zing khan Silver Jubilee Run an buatsaih a, Aizawl Municipal Corporator bialtu (ward-VII) corporator Vanlalneia'n a vailiam. Jubilee Run-ah hian principal Lalrinpuii Chhangte hoin zirtirtu leh zirlai 400 vel Zemabawk aṭanga Ṭhuampui thlengin an tlân a ni.

Kawng siam tlawh

Assembly deputy speaker Lalfamkima leh adviser to CM (political) Lalmuanpuia Punte chuan August 13, Nilaini khan Kawnpui leh Sairang inkar kawng siam mek a hmunah an tlawh a, riah chilha hna thawktute viltu PWD engineer-te nen hnathawh dan leh hmalak zel dan tur an sawiho a ni.