Loneitute tan zirhona buatsaih

Assembly deputy speaker Lalfamkima chuan nimin khan Kolasib-a Indian Council of Agricultural Research (ICAR) Complex-ah ICAR-in sorkar department-te leh loneitute tana state level workshop an buatsaih a hmanpui. Lalfamkima chuan, line department hotute chu sorkarin Bána Kaih policy a kalpuiah ei leh bara ram a intodelh theih nan an theihna leh thiamnate tuai hriam turin a chah.

Deputy Speaker chuan, Mizoram leilung duat leh enkawl uluk a ṭul thu sawiin, "ICAR scientist-te'n thlai chîn dan ṭha zawk te, leiṭha leh tui heh lo zawnga lo neih dante zirchianna neiin, mipui tan an thawh hlâwk hle. Line department-te'n sorkarin Bána Kaih a kalpui mekah ei leh bar thar chhuah kawnga ram a intodelh zel theih nan in theihna leh thiamnate tuaihriam zel ang che u," a ti.

Zirhonaah hian Kolasib bawrhsap Robert C Lalhmangaiha leh ICAR, Kolasib head Dr Sunil Doley te pawhin thu an sawi a ni.