Bán-elh chakte MLA-in lawmpuina a hlan

Lunglei High Powered Committee (HPC) vice chairman V Malsawmtluanga, Lunglei North bialtu MLA chuan nimin khan HPC conference hall-ah tun hnaia National Arm Wrestling Championship leh World Police Meet-a medal dawngtu Lunglei mi pathum hnenah lawmpuina a hlan.

V Malsawmtluanga chuan, Lunglei tlangval pathum leh nula pakhat ten India ram pum huap leh khawvel huapa medal an dawng chu a chhuan thu a sawi a, "Lunglei tan, Mizoram leh India tan in champion a ni. Tun dinhmun in thleng hi in tumruhna leh tih hram hram ṭhinna rah a ni a, a ropui tak zet," a ti a; tun aia sang zawk thlen tuma bei zel turin a chah.

HPC Vice Chairman-in lawmpuina a hlante chu - World Police Meet, 2025-a gold medal dawngtu C Lalnunpuia, Lunglei Venglai, National Arm Wrestling Championship-a gold medal dawngtu Reuben Lalhmangaihzuala, College Veng leh Lalbiakfela, Rahsi Veng leh, silver medal dawngtu Emily C Rohluzuali, Venglai te an ni.

Reuben Lalhmangaih-zuala hian Asia level-ah gold medal a dawng tawh bawk a, September 10, 2025-a Bulgaria-a World Arm Wrestling Championship neih turah India ram aiawhin a tel ang.