National Sports Day hman dan tur rêl

Sports & Youth Services minister Lalnghinglova Hmar leh department hotute chuan August 13, Nilaini khan minister pisaah August 29-a National Sports Day hman dan tur an rêl a; August 29 & 30-ah SYS department hnuaia academy te, KISCE leh district hrang hranga Khelo India Centre te, MSSC leh SAI ten an hmun ṭheuhah inelna buatsaih ni se, an ti.

Lalnghinglova Hmar chuan, National Sports Day chu Indian hockey player hmingthang Maj. Dhyan Chand pian champhaah hman ṭhin a nih thu a sawi a, "Sorkar laipuiin ram pumah uar taka hman a duh. Infiamna, hriselna leh fitness atan Mizoramah pawh uar tak leh phûr taka hman a ṭha a, a bikin zirna-inahte taksa leh rilru hrisel pawimawhzia inzirtirna remchang tak a ni,” a ti.

Ṭhutkhawmah hian SYS department, Mizoram State Sports Council, Higher & Technical Education department, School Education department, NSS, NYK leh SAI hotute an tel a; National Sports Day lawmna pui ber chu August 29-ah SAI Centre, Aizwlah hman a, futsal (mipa), inarpa-sual (mipa), volleyball (hmeichhia) leh inkawibah (hmeichhia)-ahte inel buatsaih an rel a ni.