Kristian sakhaw humhalh tlat hi MNF leh sorkar kal dan tur a ni - Tawnluia

MNF senior vice president Tawnluia, deputy chief minister ni bawk chuan, Kristian sakhaw humhalh tlat chu MNF party leh sorkar kal dan tur a nih thu a sawi.

Aizawl North-III MNF Block-in Chanmari YMA Hall-a khawmpui nimina an hmannaah thu sawiin Tawnluia chuan, "Kum khat zet chauh kan la kal chhungin sorkarin thil tam tak a thawk puitling hman hi a lawmawm tak zet. Election dawna kan intiamna tam tak kan tihlawhtling tawh a, kum khat chhunga tihhlawhtlinah chuan a duai lo hle. Mipui rinna kan la hlawh hi lawmawm ka ti a, mipui hnenah pawh lawmthu ka sawi tak meuh a ni," a ti.

Pathianin Mizo hnam leh ram a hruai tawh avangin a hruai zel a rin tlat thu sawiin Tawnluia chuan, "MNF chu Lalpa hming lam tur kan ni, min hruaitu a ni. Lalpa nen he ram leh hnam rawngbawl turin i inpe thar ang u, chu chu Pathianin mal a sawm dawn a ni. He hnam tan hian martarte'n an nun an hlàn a, chutiang nei party kan nih avang chuan tih mai mai emaw, sum ringawt zawng tur kan ni lo," a ti a; an party mite Pathian leh ram tan inhlàn thar turin a sáwm.

Aizawl North-III bialtu MLA C Lalmuanpuia pawhin thu a sawi a; an bial chhunga mi padma shree dawng tura thlan Lalbiakthanga Pachuau hnenah lawmpuina an hlan a ni.