Mizoram pumah Independence Day lawm
British awpna aṭanga India ramin zalenna a hmuh ni, Independence Day vawi 79-na chu nimin khan Mizorama district khawpui tin bakah, SDO (Civil) leh BDO ṭhuthmun ṭhenkhatahte leh hmun dangahte lawm a ni a; minister leh MLA-te'n hmanpuiin, lawmman leh chawimawina hrang hrang sem a ni.
LUNGLEI
Independence Day hi Lungleiah chuan C Ṭhuamluaia Mualah lawm a ni a, home minister K Sapdanga'n hmanpuiin, hnam puanzar a pawt pharh. Minister hian parade contingent-te'n hnam puanzar chibai an bûk a chháng lêt a, lawmman leh chawimawina hrang hrang a sem bawk.
Lungleia I-Day lawmnaah hian parade contingent 27 an awm a; armed contingent pali, unarmed contingent pakua, school contingent 11 leh pipe band pathum an ni. Unarmed contingent-ah Baptist HSS NCC Army pakhatna an ni a, school contingent-ah 2nd MAP English Medium School pakhatna an ni.
SIAHA
Siahaah chuan SDFA Ground-ah minister Lalrinpuii hoin I-Day lawm a ni. Minister hian hnam puanzar pawt pharhin parade contingent-te'n hnam puanzar chibai an bûk a chháng lêt a, lawmman leh chawimawina hrang hrang a sem.
Parade unarmed contingent-ah NCC, Don Bosco School pakhatna an ni a, school contingent-ah Siaha HSS pakhatna an ni.
CHAMPHAI
I-Day hi Champhaiah chuan Chhangphut Field-ah lawm a ni a, minister Lalthansanga'n a hmanpui. Minister hian hnam puanzar pawt pharhin, parade contingent-te'n hnam puanzar chibai an bûk a chháng lêt a, lawmman leh chawimawina hrang hrang a sem.
Champhaia I-Day lawmnaah hian unarmed contingent-ah Vengthlang M/S Boys Scout-II pakhatna an ni a, school contingent-ah Roseland Middle School (Girls) pakhatna an ni.
KOLASIB
Kolasib Sports Stadium-ah Independence Day vawi 79-na lawm a ni a, minister Vanlalhlana'n a hmanpui. Minister hian hnam puanzar a pawt pharh a, parade contingent-te'n hnam puanzar chibai an bûk a chhàn lêt bakah, lawmman leh chawimawina hrang hrang a sem.
Kolasib-a I-Day lawmnaah hian unarmed contingent-ah Diakkawn High School Air Wing pakhatna an ni a, school contingent-ah DIET, Kolasib pakhatna an ni.
SERCHHIP
Serchhipah chuan Sports Complex-ah minister of state B Lalchhanzova hoin I-Day lawm a ni a, Minister hian hnam puanzar a pawt pharh a, lawmman leh chawimawina hrang hrang a sem.
Parade contingent 17 an lám a; unarmed contingent-ah Serchhip College NCC Army Wing pakhatna niin, school contingent-ah Presbyterian English School High School Section pakhatna an ni.
LAWNGTLAI
Lawngtlai Central Young Lai Association Playground-ah pawh I-Day lawm a ni a, PHE minister Prof. Lalnilawma'n a hmanpui. Minister hian hnam puanzar pawt pharhin, parade contingent-te'n hnam puanzar chibai an bûk a chháng lêt a, lawmman leh chawimawina hrang hrang a sem bawk.
I-Day lawmnaah hian unarmed contingent-ah Don Bosco School NCC pakhatna an ni a, school contingent-ah Ngurnunsangi High School (Girls) pakhatna an ni.
MAMIT
Mamit GSA Playground-ah minister C Lalsawivunga hoin I-Day lawm a ni. Minister hian hnam puanzar pawt pharhin parade contingent 14-te'n hnam puanzar chibai an bûk a chháng lêt a, lawmman leh chawimawina hrang hrang a sem.
Parade-ah hian school contingent-ah Mamit HSS (Girl) pakhatna an ni a, unarmed contingent-ah Mamit College 1 Mizo Bn.NCC pakhatna an ni.
SAITUAL
I-Day hi Saitualah chuan Keifang Centenary Sports Complex-ah lawm a ni a, minister Dr Vanlalthlana'n hmanpuiin hnam puanzar a pawt pharh. Parade contingent 20-te'n hnam puanzar chibai an bûk chu Minister-in a chháng lêt a, lawmman leh chawimawina hrang hrang a sem bawk.
I-Day parade-ah school contingent (middle section)-ah Oxford English School pakhatna an ni a, H/S & HSS section-ah Saitual HSS pakhatna an ni.
KHAWZAWL
Minister PC Vanlalruata hoin Khawzawl Mualvawm khelmualah I-Day vawi 79-na lawm a ni. Minister-in hnam puanzar pawt pharhin parade contingent-te'n hnam puanzar chibai an bûk a chháng lêt a, lawmman leh chawimawinate a sem.
Khawzawla I-Day lawmnaah hian parade school contingent zingah Jawahar Navodaya Vidyalaya pakhatna an ni.
HNAHTHIAL
Hnahthial District Turf Ground-ah minister of state F Rodingliana hoin Independence Day lawm a ni. Minister-in hnam puanzar pawt pharh a, parade contingent 14-te'n hnam puanzar chibai an bûk a chháng lêt.
I-Day parade-ah unarmed contingent pakhat leh school contingent 13 an awm a, school contingent-ah FD Higher Secondary School pakhatna an ni.
HMUN DANG
Adviser to CM TBC Lalvenchhunga, MLA hoin Thenzawl Loṭhazawlah I-Day lawm a ni a, MLA hian hnam puanzar pawt pharhin parade contingent 18-te'n hnam puanzar chibai an bûk a chhàn lêt.
Gauhati High Court, Aizawl Bench chuan zing dar 8-ah I-Day an lawm a, High Court judge Justice Marli Vankung-in hnam puanzar pawt pharh. 225 Battalion CRPF-te'n hnam puanzar chibai an bûk a ni.
Lengpui Airport-ah pawh zing dar 8-ah I-Day vawi 79-na lawm a ni a; Airport director Saidenga'n hnam puanzar a pawt pharh a ni.
Academy of Integrated Christian Studues pawhin zing dar 7-ah an hmunah an lawm a, Mizoram sorkara secretary Dr Lalzirmawia Chhangte-in hmanpuiin, hnam puanzar a pawt pharh.