KHAWTHLIR

Minister-in kâwm

Lungleia Independence Day hmanpuia kal home minister K Sapdanga chuan nimin khan Lunglei DC conference hall-ah department hrang hrang hotute a kâwm a, an hmalakna leh hmachhawp an sawite ngaihthlaksakin, chak zawka hmalak dan tur an sawiho nghal. Home Minister hi Lunglei HPC vice chairman V Malsawmtluanga leh Lunglei West bialtu MLA T Lalhlimpuia ten an ṭawiawm a ni.

Thingzâr thlak dawn

Traffic SP Ruatsanga Ralte chuan Treasury Square (DC Complex)-a bûng zár leh Old Secretariat bula thing zár ṭhenkhat chu mipui tan a him loh avangin August 18, Pathianni-ah thlak a nih dawn thu leh, hei vang hian chawhma dar 10:30 aṭangin lirthei tlân dan tihdanglam a nih ṭhin dawn thu a tarlang.

Haemodialysis centre

Health & Family Welfare minister Lalrinpuii chuan nimin khan Siaha District Hospital-ah Haemodialysis Centre a hawng. Centre-a khawlte hi Indian Oil Corporation leh Fairfax corporate social responsibility aṭanga dawn a ni a; RO plant atan cheng nuai 15 leh pindan chhung cheina National Health Mission aṭanga dawn niin, DHME aṭangin khum pali dawn a ni bawk.

Minister-in tlawh

Disaster Management & Rehabilitation (DMR) minister Prof. Lalnilawma chuan nimin khan Lawngtlai Chandmary leh Bazar Venga in chimna hmun leh Lawngtlai III-a lei tlakhniamna hmunte a tlawh. Lalnilawma chuan, khuarel chhiatna kaihhnawihah sorkar laipui aṭanga ṭanpuina sum tam zawk hmu turin hmalak mek a nih thu a sawi. Minister hian Lairam Rescue Centre pawh a tlawh a, Rs 10,000 a hlan a ni.

Heroin man

Assam Rifles chuan August 13, 2025 khan Champhai Zote-ah heroin gram 94.6 an man a, Champhaia Excise & Narcotics department hnenah an hlan.