Taitesena YMA-in Saikhawthlira thil thleng politics game atana hman loh ni se an duh

19th August, 2025

Saikhawthlir Diltlang Lui Zaua CM Rubber Mission hnuaia chin ṭhelrêtte chu August 16, 2025 khan Assam Police leh Assam Forest mite'n an tichhia a; August 17, Pathianni khan Kawrthah SDO (Civil) Obed Lalmalsawma, Mamit SDPO Zosangliana, Kawrthah SDO, Taitesena Group YMA hruaitute leh, Chuhvel leh Saikhawthlir VC ten enfiah. Thil thleng chu politics game atana hman an duh loh thu Taitesena Group YMA chuan an tarlang.

Thu dawn danin, Diltlang Zau hi Chuhvel 4th IR BoP aṭangin km 1 vela hla a ni a, Assam IR camp aṭang pawhin km. 1 vela hla tho a ni. Saikhawthlir aṭang hian Assam lamte'n ṭhelrêt an tihchhiatna hmun chu km 1.5 vel a ni thung. Assam lamin an tihchhiatna hmunah hian Hailakandi Additional DC leh Assam Police-a Additional SP hoin an kal a, an vaiin mi 26 an ni.

Hailakandi Addl DC leh Kawrthah SDO (Civil) te chu Pathianni tlai khan Zoliana, Saikhawthlir thlâmah an inbia. Hailakandi Addl DC chuan, buaina a awm an duh bik loh thu sawiin, "Ṭhelrêt chinna hmun hi reserved area a nih avangin state pahnihin khawih lo ve ve ila kan duh. Ka naute pawh ṭhelrêt an tichhia pawh ka hau a ni," a ti.

Kawrthah SDO (Civil) chuan, Saikhawthlir VC chu kutthlak rih lo tur leh Assam lamte'n ṭhelrêt an tihchhiatte leh an duh dan angte ziakin ama hnenah emaw, Mamit DC hnenah emaw thlen turin a ti a; ṭhelrêt tihchhiata sum an lo sen tawh pawh hmuh lêt theih dan a zawnpui tur thu hrilh.

He thil thleng chungchangah hian Mamit DC, Mamit SP leh Hailakandi DC, Hailakandi SP-te inbiak an tum nia thu dawn a ni.

Taitesena Group YMA chuan, Saikhawthlira thil thlen dan chu uluk taka an vil reng thu an tarlang a, "Kan thil hmuh leh rawtna neihte state sorkarah kan thehlut dawn. State sorkarin ṭha takin hma la se kan duh. He thil thleng hi kan dem a, state sorkar, mipui leh pawl hrang hrangte ṭangrual ila kan duh," an ti.

Saikhawthlira thil thleng chungchang chu politics-a hlâwkna atana hman tum lo turin political party hruaitu zawng zawngte Taitesena Group YMA chuan an ngen a ni.