KHAWTHLIR

Speaker-in hmanpui

Assembly speaker Lalbiakzama chuan tun hnai khan Sesawng Community Hall-ah MZP Sub-Headquarters, Sesawng buatsaih zirlai ti ṭhate lawmpuina leh chawimawina a hmanpui. Speaker chuan, zirlaite chu eizawnna tlaka thiamna nei tur leh chhawr tlak ni tur te, ruihhlo laka inthiarfihlim tur leh chhuangkua leh khawtlang tibuaitu ni loa khawtlang tana mi chhenfakawm nih tum turin a chah.

Phone bo 31 pe lêt

Aizawl district police-te'n kumin July 28 leh August 17 inkara CEIR hmanga mobile phone bo an hmuh lêt 31 chu nimin khan a neitute hnenah an hlan. Phone bo hmuh lêt inhlan lêtna hi Bawngkawn Police Station OC room-ah neih a ni a, SDPO Jessica Lallawmzuali'n a kaihruai. Police hotute chuan, CEIR hmangin mobile phone bo 200 an hmuh let tawh thu an sawi.

Complaints Committee

Lawngtlai bawrhsap Cheemala Siva Gopal Reddy chuan, hna thawhna hmuna mipat hmeichhiatna lam hawia hmeichhiate venhimna 'Prevention of Sexual Harrasment of Women at Workplace' chungchanga hma la turin Local Complaints Committee a din.

CDPO pisa hawng

Social Welfare & Tribal Affairs, Women & Child Development minister Lalrinpuii chuan tun hnai khan Siaha district-a Tipa khuaah Child Development Project Officer office a hawng. Minister chuan, naupang ṭhang mekte'n an mamawh chawṭha, anganwadi centre kaltlanga sem ṭhinte chu mipuiin hlut se a duh thu a sawi a, ṭha taka naupang enkawl nachang hria nu leh pate nih tum ṭheuh turin a chah.

Lak luh khap

Mamit district magistrate K Laltlawmlova chuan thupek tichhuakin, Mamit district-ah district pawn lam aṭangin vawk leh vawksa rêp leh vawksa aṭanga siam thilte lak luh a khap a; kuhva rah ro lak luh leh phurh phal a nih loh thu a tarlang bawk. Thupek bawhchhiate chu Bharatiya Nyaya Sanhita Section 223 hmanga hrem theih an ni.