Minister-in UPSC Grooming Scheme a hawng

Mizoram Board of School Education (MBSE) buatsaih, ‘UPSC Grooming Scheme’ chu nimin khan School Education minister Dr Vanlalthlana'n a hawng.

UPSC Grooming-a tel duh tan August 29, 2025 thleng dilna MBSE pisaah thehluh theih a ni a, MBSE buatsauh HSLC Examination 2025-a total mark 405 hmu chin tan dil theih a ni.

Dr Vanlalthlana chuan, zirlaite naupang an nih lai aṭanga civil service atana inpuahchahna kalpui chu sorkarna an chan hma aṭanga an vei tawh a nih thu a sawi a, "A hlawhtlinna kan hmu ta hi a lawmawm. Education department hnuaia pêng hrang hrang MBSE, SCERT, Samagra etc. leh Mizoram Youth Commission bakah, Finance department-te nena an thawhhona ṭhat zarah kan hlawhtling a ni," a ti.

UPSC Civil Services Examination-ah ṭhangkhat lian dâwn Mizoram aṭanga tling an awm tawh lo tih sawiin Minister chuan, "Mi zawng zawngin kan vei niin a hriat a, a chhan tur âwmte pawh kan inrinsiak ṭhin. Zirlai naupang an nih aṭanga bul ṭanpui a ṭula kan hriat vangin hma kan la dawn a, tun hi pilot project a nih avangin Aizawlah kan han ti phawt a ni," a ti a, huang zauh zel tum a nih thu a sawi.

Mizoram Youth Commission chairman Malsawmzuala Ralte pawhin thu sawiin, Mizo ṭhalaite UPSC Civil Services Examination an hlawhtlin theihna tura MYC hmalak tawh dante a sawi a, "A kalhmang her rem hretin hma thar kan la a, hlawhtling ngei turin theihtawp kan chhuah dawn. Ṭhalaite tan teirei peihna leh tumruhna a pawimawh," a ti.

UPSC Grooming Scheme hi a hming tak chu 'A Scheme for Cultivating Early Foundations: Preparing Students for the UPSC Examinations from a Young Age' tih a ni a; UPSC civil service exam-ah Mizo an tlin theih nan naupangte chher hriamna atana sorkarin a duan niin, MBSE-in an bawhzui a ni.

UPSC Grooming hi HSLC zo hlim, zirlai ti ṭha zualte tana buatsaih a ni a, civil service exam tum, naupang thlante chu an kal zel dan tur sorkarin a ngaihtuahsak dawn. Kum tin buatsaih theih beisei a ni a, naupangte chu UPSC prelims paper II behchhana exam tir a, a ti ṭha zualte chu interview an paltlang hnuah coaching centre ṭhaah admission tihsak an ni ang. Coaching centre-te nen hian MoU ziah a ni dawn.

Mentoring programme duan a ni bawk a, chutah chuan IAS ni mek leh châwl tawhte leh sorkar hnathawk dangte nen inkawmna hunte leh inkaihhruaina hunte buatsaih ṭhin tum a ni.