NESO bultumin zirlai pawl pungkhawm

North East Students' Organisation (NESO) bultumin nimin khan hmarchhak stgate hrang hrangah 'Sit-in Protest against Illegal Immigration in North East States' an huaihawt a ni a, NESO-a tel MZP pawhin Vanapa Hall kawtah an huaihawt.

Lungawi loh lantirnaah hian NESO vice chairman Ricky Lalbiakmawia leh MZP president H Lalthianghlima ten thu an sawi. NESO-a tel zirlai pawlte hian an awmna state-a chief minister ṭheuh hnenah memorandum inang tlang an thehlut a, MZP pawhin Mizoram CM hnenah an thehlut a ni.

H Lalthianghlima chuan, hmarchhak state-te chu dan loa Bangladeshiaṭanga lutte'n an tibuai nasa tawh tih sawiin, "Assam phei chu an buai hle tawh. Mizoram pawh kan harh a ṭul a, Assam aṭanga illegal immigrant an hnawhchhuahte hian Mizoram bak pan tur an nei lo. Kan sorkarin rua-hmanna khauh tak siam se, ramri ven uluk a ngai," a ti.

NESO MEMORANDUM
1. Dan loa pêm lutte hriat chhuah thuai leh ram danga thawn chhuah theihna tura hmalakna khauh tak kalpui.
2. Indo-Bangla ramri khâr.
3. Ramri thunun leh enkawltute tihchak a, a bik takin hmun khirh/harsa zawkah security personnel tling tak tak dah a, tunlai thiamna surveillance technology hmanga thuam ni se.
4,. Dan loa ram chhunga rawn pem lutte chu hmun dangah sawn kual mai mai an nih lohna turin ṭhenawm state-te leh a kaihhnawih agency-te nena thawhhona ṭha neih ni se.
5. Ram leilung fate dikna, hnam ziarâng leh nunphung, ṭawng, politics leh ram neitu an nihna humhalh leh venhim ni rawh se.
6. Hmun ṭhenkhat, mihring pun chak lutukna hmunah an chungchang ngaihtuahtu tur special review committee din ni rawh se.