Chetsualna vangin mi pathum an thi

April 17, Pathianni leh nimin zing khan chetsualna avangin Serchhipah mi pahnih leh Rangvamualah mi pakhat an thi.

Pathianni tlai dar 3 vel khan David Lalsangzuala, Khuangleng khua chuan a taxi khalhin Rangvamualah thingkung a sû a, a hmunah hian ká chhawn lohin a thi. Tihfel ngaite tihfel a nih hnuah David Lalsangzuala ruang hi an khua an panpui a ni. taxi-a chuang ve mi pakhat pawh a hliam a, Civil Hospital, Aizawlah hruai a ni.

HD Malsawmpuia (14) s/o HD Lalhmachhuana (L), Serchhip AOC Veng chu Pathianni tlai khan Serchhip Entlanga Chhunkhah tuikhuahah chesualin tuiah a tlahlum.

Thu dawn danin, HD Malsawmpuia hi a ṭhiante nen Chhunkhah tuikhuahah an kal a, tui hleuh a thiam loh avangin a ṭhiante chuan cheng ve lo turin an ti a ni. Mahse, HD Malsawmpuia hi a cheng ve ta tho a, tâlbuai zuiin, a ṭhiante chhan tumin mah se, an chhan thei lo. A ṭhiante hian mi dang an pun hnuah a ruang an la chhuak a ni.

B Vanlaldika (23), Serchhip P&E Veng chu nimin zing khan a bike dahna bulah thia hmuh a ni a, nimin vek khan vui a ni.

Thu dawn danin, B Vanlaldika hi Pathianni zan khan mitthi lumennaah a kal a, zing ṭawngṭai inkhawm kal turte'n a bike dahna ṭhin bulah an hmu a, a bike-in a nghawngah a delh. A bike dah fel tur chesual palhin, bike-in a nghawngah a delh nia rin a ni.