Pitar kum 80 mi kut tuarin a thi

Runliani (80) m/o Zoramliana, Maubawk, Aizawl chu nimin khan an chenna inah thia hmuh a ni a, a nghâwngah chema zaina hnûhma a awm avangin mi kut tuara thi a ni ngeia hriat a ni.

Vanglaini thu dawn danin, Runliani hi a fanu leh a tupa (a fanu fa) te nen an khawsa a, an inah hian eichawp dawr an siam. Nimin chhun dar 1 rîk hma deuh khan naupang kuhva lei tur chuan Runliani chu chhuata puana lo inkhuh, thî hnuanga awm a hmu a; Runliani te in bul chiaha mite a hrilh nghal a, an enfiah chuan a thi tawh.

Runliani te inah hian Police-te leh Forensic Sciene Laboratory-a thawktute an kal nghal a, tih tur ṭulte an tih zawhah a ruang chu damdawi-inah endik (postmortem) a ni.

Maubawk khawtlang chuan Runliani thattua rinhlelh an nei a, tun hma pawhin Runliani hi kut a lo thlak tawh bakah, pawisa a lo chhuhsak tawh a ni. An rinhlelh hi Runliani te ṭhenawm hnaia awm a ni a, Maubawk khawtlang leh police-te'n an zawng mek a, nimin tlai lam thleng kha chuan an la man lo.