LADC Chairman leh Dy Chairman ten Governor hnenah bânna an thehlut

Lai Autonomous District Council (LADC)-a chairman T Zakunga leh deputy chairman C Biakthansangi te chuan nimin khan an nihna aṭanga bânna Governor hnenah an thehlut.

Thu dawn danin, LADC chief executive member (CEM) atana August 18, Thawhṭannia lak luh tak N Zangura chu sorkar siam tura thlâwptu a ngah leh ngah loh fiah turin chairman T Zakunga'n nimin chhun dar 12-ah session neih turin a ko a; mahse, session ṭan hma chawhma dar 11:30-ah Chairman leh Deputy Chairman chuan bânna an thehlut.

LADC Chairman leh Deputy Chairman ten bânna an thehluh avang hian session kaihruaitu tur an awm lo a, nimin khan N Zangura kaihhruai sorkar chu fiah theih a ni lo.

T Zakunga hi March 26, 2025 khan LADC chairman atan thlan a ni a, C Biakthansangi hi kumin April 22 khan deputy chairman atan thlan a ni bawk.

LADC-a MNF MDC 11 leh leh BJP MDC pahnihte'n an din United Democratic Alliance (UDA) sorkar tharah Chairman leh Deputy Chairman an bân avang hian UDA hotute chuan protem chairman ruat turin Governor ngen thuai an tum nia thu dawn a ni. Governor-in protem chairman a ruat chuan protem chairman kaihhruaiin chairman thar thlan a ni ang.