Hotute hmaa thu dik ṭan ngam turin DPAR Minister-in officer tharte a chah

Department of Person-nel & Administrative Reforms (DPAR) minister K Sapdanga chuan nimin khan Administrative Training Institute (ATI) hall-ah civil service officer 2025 batch-te tana Residential Foundation Training buatsaih a hawng. Minister chuan, hotute hmaah thu dik ṭan ngam turin officer tharte a chah.

K Sapdanga chuan, officer tharte chu an thil zirte hmang ṭangkai tur leh training-naah zawhna zawt tam turin a chah a, "Ram ban pui, sorkar za pui, sorkar chelh dingtu tur in ni," tiin, hotute hmaah thu dik ṭan ngam a, ram siamṭhatnaa kawngro sutu tur an ni tih hre reng turin a fuih a ni.

DPAR secretary K Lalthawmmawia pawhin thu sawiin, officer tharte chu mahni tan ni lo, ram leh hnam leh sorkar tana hnaa lut an nih tih hre tur te, mahni duhzawng leh hlâwkna tur chiah ûm lo a, sorkar hnathawk awm dan tura beiseite hre reng turin a chah.

Foundation Training-ah officer thar 34 an tel a; ATI director Rita Lalnunmawii Pachuau, ATI course director Lalhmansanga leh joint director (training) Lalrimawii Hmar ten thu an sawi bawk.