KHAWTHLIR

Internship ṭan

College of Horticulture, Thenzawla BSc final year zirlaite chuan nimin aṭang khan KVK, Kolasib-ah Rural Horticulture Work Experience - Internship program an ṭan. BSc final year zirlaite hi mi 25 an ni a, assistant professor Dr Lalhmingsanga'n a ho. KVK Kolasib-ah hian thla khat chuang internship hun an hmang dawn a ni.

Vuah turin hriattir

Siaha district transport officer Dr Manesia Khaimeichho chuan hriattirna a tichhuak a; Siaha district-a lirthei lian - bungraw phur, zirna-in bus, tuialhthei phur (tanker) leh bawlhhlawh paih motor neitute chu an lirtheiah ni 90 chhunga speed limiting device (SLD) vuah vek turin a hriattir. Mipui phur lirthei - taxi, bus, maxicab leh sumdawnna lirthei dangte pawh vehicle location tracking device (VLTD) vuah vek turin a hriattir bawk.

Ui khuahkhirh

Lawngtlai bawrhsap Cheemala Siva Gopal Reddy chuan Lawngtlai district-ah ui khuahkhirh a nih thu a puang. DC chuan, ui vulhtute chu an ui vulhte khuahkhirh tlat tur te, khawlaia chhuahpuite chu ui thlunna (chain) hmanga kai ngei tur te, khawlaiah ui zun leh êk hnutchhiah lo tur te, mi dang tan harsatna siam zawnga ui vulh lo turtein a hriattir. Ui khuahkhirh lohin mi a seh chuan ui neitu chu thla ruk chhung tàntir emaw, Rs 5,000 thleng chawitir emawa hrem theih a ni.

AR-in meth man

Assam Rifles sipaite chuan August 18, Thawhṭanni khan Zokhawthar Crossing Point-ah methamphetamine mum 70,700 (kg. 6.86) an man a, Narcotics Control Bureau, Aizawl hnenah an hlan.

Lunglei Red Run

Mizoram State AIDS Control Society chuan nimin khan Lunglei District Red Run 2025 an buatsih a, Lunglei district-a college hrang hranga Red Ribbon Club panga aṭangin zirlai 150 vel an tel. Red Run-a telte hi additional DC Zoramdini'n a vailiam a, Venglaia Tennis Court hlui aṭanga BCM Lunglawn East biak-in bulah kualin, Tennis Court-ah an lêt leh a ni.