Photography Day pualin exhibition

Nimin kha World Photo-graphy Day vawi 186-na a ni. He ni pual hian Mizoram School of Photography leh Photography Club of Mizoram chuan Archives Hall, Aizawlah Art Exhibition & Competition an buatsaih a, MLA Baryl Vanneihsangi'n a hawng. Mizo Photographers’ Society-in Millennium Centre atrium-ah Photo Exhibition an buatsaih bawk.

Art Exhibition & Competition hawngtu Baryl Vanneihsangi chuan, thlalak chu Mizo hnam nunphung leh hmanlai thilte vawng ṭhatu a nih thu sawiin, "Kan hriatrengna a hun lai ang maia min ngaihtuah lettir theitu an nih avangin thla la thiamte an hlu hle," a ti a; thlalak lama tuite chu inchher hriama an thiamna tipung zel turin a fuih.

Mizoram School of Photography dintu Malsawmtluanga sawi danin, Exhibition hian August 23, 2025 thleng a awh dawn. Art Competition-ah mi 49 telin, thlalak 108 a lut a, nimin khan result puan a ni. Pakhatna Mama Ralte-in Rs 10,000 leh nomawi, pahnihna Lalbiakzama'n Rs 7,000 leh nomawi, pathumna Lalawmpuia'n Rs 5,000 leh nomawi an dawng.

Millennium Centre chhuat záwl (atrium)-a Mizo Photographers’ Society (MPS)-in Photo Exhibition an buatsaih chu Information & Public Relations director C Lalnunkima’n a hawng a; MPS member mi 39 kutchhuak thlalak 108 pho chhuah niin, vawiina chhunzawma zawh a ni ang.

C Lalnunkima chuan, photography nodal department IPR-in a theih ang angin thlalak lam hmasawnna atan hma an la ṭhin tih a sawi a; social media chu photography tel loin thui tak a kal thei lo tih sawiin, "Social media khawvelah photography pawimawhna a sang telh telh zawk emaw tih mai turin thil a kal a ni," a ti.