Ruihhlo donaah theihtawp chhuah turin Minister-in MHIP-te a sâwm

Social Welfare, Women & Child Development minister Lalrinpuii chuan nimin khan Lunglei Chanmari-a MHIP Sub-Headquarters, Lunglei hnuaia vohbikte enkawlna Onyx Special School leh Girls' Hostel a tlawh a; ruihhlo dona leh ruihhlo la ti lote vên kawngah theihtawp chhuah turin MHIP-te a sáwm.

Lalrinpuii chuan, ruihhloin Mizoram a tichhiat nasat thu leh ruihhlo donaah ngawrh taka hmalak a ṭul thu sawiin, "Sorkarin Hulhliap leh ruahmanna hrang hrang kaltlangin inzirtirna te, inenkawlna leh invenna lamte buatsaihin nasa takin hma a la a ni," a ti.

Sorkarin Mizoram Universal Healthcare Scheme a kalpuinaah leibâ a awm loh thu sawiin Minister chuan, "April 1, 2025 aṭangin sorkarin kar tin damdawi-in bill a pe a, bill bâ pakhat mah a awm lo. A chhawrtute an lawm a, ram mipuite'n an chhawr vek theih nan August thla hi kumin atana inziah luh hun hnuhnung a ni," a ti a, private hospital-te pawhin MUHCS an zawm kim thuai a beisei thu a sawi.

Lalrinpuii chuan, sorkarin vohbikte hamṭhatna tur hrang hrang a kalpui thu leh Lunglei Sub-Hqrs MHIP-in kum 2003 aṭanga special school an kalpui chu ropui a tih thu sawiin, an mamawhte sorkar aṭanga tih theih leh CSR kaltlanga tih theih turte chu a ṭul anga a bawhzuipui tur thu a sawi a; sikul mamawha hman turin Rs 10,000 a hlan a ni.