LMC-in State Priority Projects hnuaiah cheng vbc 17.50 hû project 5 hmu tawh

Lunglei khawpui tan State Priority Projects hnuaiah cheng vbc 17.50 hû project panga pawm a ni tawh a; Garbage Free City hmalakna chhunzawm nan Lunglei Municipal Council (LMC) urban local body grant 2023-24 first installment sum bâng aṭangin in tina bawlhhlawh bâwm sem tur lei a ni dawn.

LMC chairman Lalzuithanga kaihhruaiin nimin khan LMC Board of Councillors an ṭhu a, nominated member MLA pathum - Lunglei East bialtu Lalrinpuii, Lunglei North bialtu V Malsawmtluanga leh Lunglei South bialtu Lalramliana Papuia ten telpuiin, LMC dinhmun leh hmalakna turte an sawiho.

Lalzuithanga chuan, State Priority Projects hnuaiah Lunglei khawpui tan project pawimawh panga pawm a nih tawh thu a sawi a, "Project panga hi cheng vbc 17.50 hû a ni a, Sazaikawna LMC Complex sakna tur cheng vbc 4, Hrangchalkawna Transport Hub sakna tur vbc 3.5, Ramthar AOC-a Market Shed sakna tur vbc 2 leh C Ṭhuamluaia Muala Multi-Level Car Parking sakna tur vbc 3-te a tel," a ti.

Minister Lalrinpuii chuan, LMC hnuaia Lunglei khawpui mawina tur leh mipui tana hmalaknate chu ṭha a tih thu sawiin, "LMC ward leh bial hmasawn nan MLA leh councillor-te thawhhona ṭha a pawimawh," a ti a; hmasawnna atan sorkar nawr leh um zui kawngah inthlahrung lo tur leh Lunglei tan theihtawp chhuah zel turin councillor-te a chah.

Ṭhutkhawmah hian State Priority Projects hnuaia Lunglei Venglaia Tennis Court hlui hmuna Green Park cum Parking siamna tura cheng nuai 500 hû detailed project report ruahman chu a hmunhma leh thil dang chinfel ngai a la tam avang leh, sum a kîr (lapse) loh nan Saikuti Hall chei ṭhat nana ruahman an rel a ni.

Lungleia faina leh thianghlimna lama hmalaknaah, Solid Waste Management Centre I-in a ken tel bawlhhlawh bâwm sem mek chhunzawmna tur leh, Garbage Free City hmalakna chhunzawm nan urban local body grant 2023-24 first installment sum bâng aṭangin in tina bawlhhlawh bâwm sem tur lei ni se, an ti bawk.