NH kawng chhia thawm ṭhat dan tur rêl

Serchhip bawrhsap Paul L Khuma hoin August 18, Thawhṭanni khan tunlaia ruahsur nasa leh leimin vanga Serchhip district-a National Highway kawngpui chhia thawm ṭhat dan tur rêl a ni. Bawrhsap chuan, NHIDCL contractor-te'n kawng siam dan tur an duan leh hun bithliahte an zawm ṭhat dan vilpui turin khawtlang hruaitute leh mipui a ngen.

Serchhip DC office aṭangin NH team feh chhuakin, kawng chhe lai an fang chhuak a, thla an la vek bawk. Contractor-te'n kawng chhia an thawm ṭhat dan tur ruahmanna DC hnena an thehluhte sawiho a ni a; kawng chhiate chu a rang lama siam leh thawm ṭhat nghal a ngaih avangin contractor-te chu hna an thawh dan tur hun bithliah siamsak a ni.

Tarlan danin, Serchhip district-a NH enkawltu NHIDCL hnuaia contractor-te chu hlawm (package) thumah ṭhen an ni a, kawngpui enkawl lai bik an nei. NH-02 laitu contractor-te'n kawngpui an siam zawh tawh hnuah kum nga chhung an vil zui dawn a, kuminah an vil hun tur (defect liability period) a inṭan.

ṬHUTKHAWMA TARLANTE

☑ Package-I enkawltu contractor-in October 2025 chawlhkar thumna ral hmain an enkawl chin blacktop zawh hman an tum a, kawng khuar lai hnawh khah hna tun kar chhunga zawh hman an tum.

☑ Package-II enkawltu contractor-in an enkawl china khuar thûk leh chhe zualte tun karah hnawhkhah zawh an tum.

☑ Baktawng leh Serchhip inkar chu November 15, 2025-ah siam zawh hman tum a ni a, retaining wall chim chu October 15, 2025-ah siam zawh hman tum a ni.

☑ November 15 - December 1, 2025 chhungin Sailiamkawn - Keiṭum inkar kawng blacktop zawh tum a ni. An tum anga a huna an zawh chuan Serchhip by-pass road-a leimin nasat berna hmun an khawih chhunzawm nghal ang a, January 2026 chhunga zawh hman an inbeisei.