Sorkarin lirthei lei theih man zat a tipung

Mizoram sorkar chuan Assembly speaker, minister, minister of state, adviser to chief minister, State Planning Board vice chairman leh sorkar hnathawkte hman tur lirthei (official car) leina man tur zat bithliah tharin, a tipung. Sorkar lirthei leina man bithliah chungchang hi nimin Nilainia chhuak Vanglaini-ah ziah sual a ni.

Sorkarin a ruahman dan chuan, Category I-a awm Assembly speaker, dy speaker, minister, minister of state, adviser to CM, State Planning Board vice chairman leh chief secretary te tana lirthei lei theih man zat tura bithliah chu Rs 15,00,000 aṭangin Rs 22,00,000-ah a tipung.

Category II-a awm state sorkara principal secretary, commissioner, secretary leh an tlukpuite tana lirthei Rs 12,00,000 man thleng lei theih ni ṭhin chu Rs 19,00,000-ah tihpun a ni. Category III - DC, additional secretary, joint secretary, head of department leh an tlukpuite official car man zat chu Rs 10,50,000 aṭangin Rs 15,00,000-ah a pung.

Category IV-ah lirthei dawng thei officer dangte leh pool vehicle dah a ni a, a man bithliah chin chu Rs 8,50,000 aṭangin Rs 12,00,000-ah tihpun a ni a; category V-a awm Police leh Excise-te operational vehicle man chu Rs 7,50,000 aṭangin Rs 10,00,000-ah tihsan a ni. Category VI-ah two wheeler awmin, Rs 80,000 aṭangin Rs 1,00,000-ah tihpun a ni bawk.

Sorkar lirthei lei theihna man zat tihpun a nih rual hian mamawh dan leh enkawl zuinaa awlsam leh zângkhai tur ngaihtuah chunga lei tura tih a nih bakah, department-te chu car lian tak tak lei lo tura tih an ni a; sorkar lirtheite a inan tlan theih nan a var emaw, off white emaw, a var lam lei tura tih a ni.

(Sorkar lirthei leina man bithliah thar chungchang hi nimin Nilainia chhuak Vanglaini-ah ziah sual a ni a, tihhniam a ni zawk anga ziah a ni. Kan tihsualah thuphâ kan chawi a, sorkar hotute leh mipui hriatthiamna kan ngen e. - Editor, Vanglaini)