Police-in meth leh heroin an man

Mizoram police-te leh an thawhpuite chuan tun hnai khan hmun pahnihah methamphetamine leh heroin tam tham tak an man a; ruihhlo donaah thâ thlah loa theihtawp an chhuah zel thu an tarlang.

Mizoram Police CID (Crime) hnuaia Special Narcotics Police Station leh Aizawla CRPF-te ṭang dun chuan August 18, 2025 khan Muallungthu leh Hualngohmun khuaah joint operation an nei a; Mahindra Bolero MZ-05 6161 aṭangin methamphetamine kg. 7.955-a rit an man.

Meth kaihhnawihah hian Shanti Jeeban Chakma (30) s/o Vinanda Chakma, Ulusury, Lawngtlai district, tuna Hunthar Veng, Aizawla khawsa mek nia inchhal leh, Brighu Dhan Chakma (31) s/o Rivodi Kumar, Marpara, Mamit district nia inchhál an man a; NDPS Act tlawhchhanin thubuai ziah luh a ni.

Hnahlan Police beat post-a duty police-te chuan August 17 zan khan Hnahlan khaw daiah Eco van MZ-01 Z-6975 aṭangin heroin gram 240 (hawng 23) an man a, lirthei khalhtu erawh a tlanchhiat avangin an man hman lo. Champhai Police Station-ah NDPS Act tlawhchhanin thubuai ziah luh a ni a; police-in an chhui zuina kal zelah Ahmed Ali (26), Nilam Bazar, Karimganj, Assam chu Vapar khuaah an man a ni.