CM Rubber Missions thawh hnihnaah ram hectare 173-a zaua tih belh remti

Chief minister Lalduhoma chuan nimin khan a pisaah Mizoram Rubber Society (MIRSO) hruaitute a kâwm a; Chief Minister's Rubber Missions thawh hnihnaa hmalakna atan ram hectare 173 tih belh an dil chu a remti.

MIRSO president Hrang-zuala chuan, sorkarin a tirh anga Mamit district-a CM Rubber Missions thawh hnihna hmanga hmalakna tur khua an tlawh chungchang a sawi. Loneitute'n CM Rubber Missions chu ṭha an tih thu leh an nghahhlelh thu sawiin, hmalakna hmanga bul ṭan ve ngei duh an tam thu te, second phase atana hmalakna tur ram hectare 400-a zauah an inkhung len loh thu leh, hectare 173-a zau an mamawh belh thute a thlen a ni.

Lalduhoma chuan, CM Rubber Missions thawh hnihna atana MIRSO-in ram an dil belh hectare 173 chu pek a remti a, a mawhphurtu official-te a hriattir nghal. Subsidy-a ṭhelrêt sawngbawlna khawl 100 pek chhuah tur chu chak taka bawhzui a nih thu a sawi bawk.

CM Rubber Missions second phase-ah hian ram hectare 2,400-a zauah hmalak tum a ni a, chu'ng zinga hectare 1,200 chu NABARD sum hmanga kalpui tur niin, hectare 1,200 dang chu Handholding scheme aṭanga kalpui tum a ni.

MIRSO dilna anga ram hectare 173 tih belh chu Handholding scheme hnuaia kalpui tur a nih avangin Handholding scheme kaltlangin ram hectare 1,373-a zauah hmalak a ni ang.