LADC protem chairman atan Lalthanmawia Colney la lut

Mizoram Governor Gen. Dr Vijay Kumar Singh chuan Lai Autonomous District Council (LADC) chairman lailawk (protem chairman) atan Lalthanmawia Colney a ruat a, nimin khan Lawngtlai additional DC David Lalrinawma'n rinawmna thu tiamtirin a la lut.

LADC Protem Chairman lak luhna hi Lawngtlai Additional DC pisaah neih a ni a, BJP leh MNF MDC-te'n an din United Democratic Alliance-a MDC leh mi pawimawh dangte an tel.

Lalthanmawia Colney hi LADC-a nominated member (MDC) a ni a; a kaihhruaina hnuaiah naktuk August 22 hian LADC Chairman tur thlan a ni dawn nia thu dawn a ni. LADC Chairman thar kaihhruaiin chief executive member (CEM) atana August 18, 2025-a lak luh N Zangura chu thlawptu a ngah leh ngah loh fiah a ni dawn nia thu dawn a ni bawk.

Tarlan tawh angin, LADC chairman T Zakunga leh deputy chairman C Biakthansangi te chuan August 19, Thawhlehni khan an nihna aṭanga bânna an thehlut a; hei vang hian August 19-a CEM N Zangura, sorkar siam tura thlâwptu a ngah leh ngah loh fiah tura tih chu kaltlangpui theih a ni lo.