KHAWTHLIR

Thisen pe

Lawngtlai College NSS chuan nimin khan Lawngtlai District Hospi-tal tan thisen unit 29 an pe a, petute mipa 23 leh hmeichhia paruk an ni.

Meth & heroin man

Assam Rifles sipaite chuan August 19, Thawhlehni khan Zokhawthara Crossing Point no. 3-ah mi pakhat hnen aṭangin methamphetamine mûm 30,300 (kg. 3.33) leh heroin gram 190.90 an man. Ruihhlo kengtu a tlanchhe hman a, a Kenbo bike leh mobile phone a tlanchhiatsan. Ruihhlo, bike leh mobile phone-te hi Champhaia Excise & Narcotics department hnenah an hlan a ni.

Man thuai phût

MHIP Gen. Hqrs leh Mizo National Women Front chuan thuchhuah siamin, August 19, Thawhlehnia Runliani, Maubawk thattu man chhuah thuai leh a phû tâwka hrem ngei ni se an duh thu an tarlang. MHIP chuan, "Hmeichhe kum upa tawh tak chunga hetiang a thleng hi kan tuar thiam lo hle a, thleng tawh lo se kan ti," an ti a; MNWF chuan, "Pi Rûnliani ama in lum ngeia râwng taka thah a ni hi pawi kan tiin rapthlak kan ti tak zet. A kalsan a tu leh fate Pathianin thlamuanin awmpui zel rawh se," an ti.

CM leh Finance dept.

Chief minister Lalduhoma, Finance department enkawltu chuan nimin khan a pisaah Finance department hotute a kâwm. Tun hnaia an hmalakna - Compensatory Afforestation Fund Management and Planning Authority (CAMPA), Mizoram dinhmun leh hmalak mekna te, 15th Finance Commission 2023-24 Grant tun hnaia hmuh chungchang leh, Finance kaihhnawih tun hnaia hmalakna langsar zual te, audit leh Project Monitoring Committee nena hmalakhona turte sawiho a ni.

SEC-in hun sawn

State Election Commission chuan thuchhuah siamin, Aizawl Municipal Corporation inthlanpui awm tura electoral roll thar tlangzarh hun atana ruahman December 8, 2025 chu January 7, 2026-ah sawn a nih thu a tarlang. AMC term kal lai hi February 16, 2026-ah a tawp dawn avangin AMC inthlanpui awm tur atan September 24-ah draft roll tlangzarh tum a ni a, October 25 thleng ennawn nan hun hman tur a ni.

LADC draft roll

Lai Autonomous District Council (LADC) inthlanpui vawi 12-na awm tura hman tur draft electoral roll chu nimin khan DRDO project director H Zonunmawia'n a tlangzarh a, voter 53,880 awmin, mipa 26,604 leh hmeichhia 27, 276 an ni. E-roll-a hming thun, paih leh siamṭhat duh nei tan September 4, 2025 thleng hun hawn a ni a, September 30, 2025-ah final roll tlangzarh a ni ang. LADC sorkar kal lai hi December 18, 2025-ah a tàwp dawn a ni.

Thawhho dan tur rel

Serchhip District Convergence Committee for SBM(U) and SBM(G) chu bawrhsap Paul L Khuma kaihhruaiin August 19, Thawhlehni khan an ṭhukhawm a; faina kawnga UDPA department-in Swachh Bharat Mission (Urban) leh PHE department-in Swachh Bharat Mission (Gramin) an kalpui meka department pahnihte thawhho dan tur an rêl. Department pahnih hotute'n thawhho dan tur (convergence plan) mumal takin siam se, an ti.

Sawhthing inzirtir

KVK, Hnahthial chuan nimin khan Mission Organic Value Chain Development for North East Region (MOVCD-NER) hnuaia Hnahthial, Aibawk leh West Phailenga service provider - Future Foods hruaitute pualin sawhthing dahṭhat dan leh sawngbawl dan tur zirhona an buatsaih a; subject matter specialist (home science) Zonunkimi Ralte-in thil pawimawhte a zirtir a ni.

AR-in hmanpui

Assam Rifles chuan nimin khan Kawlbem High School-ah World Mosquito Day leh National Sadbhavana Divas pualin hun an hmang a, zirlai 50 leh zirtirtute an tel. Thosiin natna a thlen theih dante leh thosi laka inven dante bakah, hnam leh chi inkara remna leh muanna a awm a ṭulziate an hrilhfiah a ni. AR hian August 19, Thawhlehni khan New Vaikhawtlang High School zirlaite nen World Humanitarian Day an hmangho bawk.

Redressal Day hmang

Lawngtlai DC pisa bultumin nimin khan DC conference hall-ah khua leh tuite ngaihsak a, harsatna chinfel ní, Citizen Care-Grievance Redressal Day hman a ni. Redressal Day hmanna hmunah hian chawhma dar 10:30 aṭanga tlai dar 5 thleng mipui dàwr theih turin sorkar department 13 aiawhte an inhawng a ni.