Officer-te lirthei leh household peon kawl zat enfiah turin CESJ-in CM ngen

Centre for Environment & Social Justice (CESJ) chuan nimin khan Chief Minister hnenah sorkar hnathawkte’n danin a phalsak piah lama sorkar lirthei an kawl leh in lama awmpui (household peon) an kawlte enfiah tur leh siamṭha tura ngenna an thlen.

CESJ chuan, Mizoram sorkarin nasa taka sum a indaih loh thu leh Mizoram budget zinga 87% vel sorkar hnathawk hlawh leh inrêlbâwlna atan hman a nih thu tarlangin, "Inrenchem loa mipui chhiah pek tling khawm hmanga household peon leh motor kawl ang chi hi dodalin kan bei zel dawn," an ti.

Mizoram sorkarin sum renchemna atana officer-te household MR kawl theih zat nasa taka titlem chu lawmawm an tih thu an sawi a; chutih rualin, officer lian ṭhenkhat, mahni parent department páwna posting/deputation-a awmte’n an parent department aṭang leh an awmna department/secretariat aṭangin household employee dawng kawp an awm niin an tarlang.

CESJ tarlan danin, Secretariat-a police officer awm zingah Police danin a phal anga Police department aṭangin ardali kawl, Secretariat aṭanga household MR kawl tel bawk an awm a, Chief Secretary ai pawhin household worker an kawl tam zawk a ni.

Sorkarin Vehicle Outsourcing Policy a kalpui mek chu sorkar sum tam tak hum phahna a nihi ngei an rin thu sawiin CESJ chuan, "Hetih lai hian, officer lian zingah he policy hnuaia mahni lirthei hmang (outsourced) chunga an thawhna department vehicle kawl tel tho an awm tih hriat a ni. An entitlement aia tam sorkar motor an kawl hi sorkar policy zahlohna leh corruption lian tak a ni," an ti a; lirthei kawl theih zat aia tam dap chhuak a, tihtawp a nih thuai theih nan hma la turin CM an ngen.

CESJ chuan, kum 2016-a DGP-in police officer-te tana Vehicle Entitlement Notification a siam ang chuan, DGP-in lirthei pathum a kawl theih laiin, tunah pali a kawl mek bakah, VIP reserved vehicle panga a kawl tel thu an tarlang. DIGP leh a chung lamte'n lirthei pahnih ṭheuh an kawl theih angin an kawl mek tih sawiin, "Anni hi field executive officer ni loin, supervisory officer an nih avangin motor pakhat bak an mamawh loin kan hria; department danga an tlukpui leh supervisory officer dangte kawl theih zat aia tam motor an kawl bik hi public interest niin a lang lo," an ti.

Security SP-in VIP escort/pilot atan LMV 17 a kawl theih laiin, 27 a kawl mek thu te, police officer ṭhenkhatin an kawl theih zat aia tam an kawlte chu chhuhsak a, a mamawhtu zawk police station leh district-ahte pek ni se an duh thu an tarlang bawk.