MSME scheme hrilhfiahna leh sawihona

Micro, Small & Medium Enterprises (MSME) hnuaia kutkawih eizawnna dinte tan nimin khan Commerce and Industries department chuan Dawrpui Multipurpose Hall-ah Ministry of MSME hnuaia scheme hrang hrang inhrilhfiahna leh sawihona an buatsaih a; mahni kutkawiha eizawng (entrepreneur) mi 70 vel an tel.

Workshop on Promotion, Development and Empowerment of MSME’s in Mizoram hi chief secretary Khilli Ram Meena leh sorkar laipuia Ministry of MSME secretary SCL Das ten an kaihruai a; Ministry of MSME joint secretary Mercy Epai leh Ateesh Singh ten 'Overview of Schemes of Ministry of MSMEs' tih thupui leh 'Credit and Finance for MSME and Issue of Delayed Payments' tih thupui an sawifiah.

SCL Das chuan, MSME kalpui danah sorkar laipui chuan state-in hma a lak meknate a theihna laia tichakin hma a lakpui thu a sawi a, "Ṭhalai hnathawk rual tamna ram chu ram vanneihna a ni a, thiamna hman tlak tak tak kan zir chhuahte a taka hman ṭangkai thiam a pawimawh," a ti a, kal dan pangngaia kal ringawt chuan hmasawnna tam zawk hmuh a harsat thu a sawi.

Chief secretary Khilli Ram Meena pawhin workshop aṭangin sorkar laipuiin state a ngaihsakna a lan thu a sawi a; Mizoram chu MSME lama ṭan lakna tlak a nih thu leh Mizoram sorkar flagship programme - Handholding scheme hnuaiah pawh MSME kaihhnawih hmalakna tam tak a tel thu a sawi bawk.