Kuhva rah tawlhrûk a tawp theih nan nasa zawka hma la turin MKCP-in ngen

Mizoram Kuhva Chingtu Pawl (MKCP) chuan thuchhuah siamin, Mizoramah ram dang kuhva tawlhruka sumdawng an la awm reng chu a pawi an tih thu an tarlang a; kuhva rah tawlhruk a tawp theih nan nasa lehzuala hma la turin thuneitute an ngen.

MKCP chuan, ram dang kuhva tawlhruk chuan Mizorama kuhva chingtute thar hralhnaah harsatna a thlen ṭhin tih sawiin, "Kuhva rah thar a hun leh dawn a, kut hnathawktute'n harsatna kan tawh loh nan Mizoram sorkara thuneitu leh kan police-te pawhin nasa lehzualin hma la se kan duhin kan beisei a ni," an ti.

August 2025 chhungin Police leh Assam Rifles ten hmun pathumah dan loa ram dang kuhva ro tawlhtuk an man tih sawiin MKCP chuan, "Mizoram Police leh AR te rintlakzia leh fakawmzia a takin kan hmu a, a thlamuanthlak a ti hle," an ti a; an lawm thu an tarlang.

MKCP chuan, ram dang kuhva ro donaah chak zawka hma la turin ruahmanna an siam dawn tih sawiin, khaw hrang hrang an branch leh member-te chu ram dang kuhva do tura lo inkau reng turin an chah a ni.