MLA-in YMA Inkhawmpui Lian pandal enfiah

Sakawrdai khua chuan kumin October thlaa YMA Inkhawmpui Lian an thleng dawn a, pandal an sa mek. Pandal sak mek hi bialtu MLA Lalchhandama Ralte, opposition leader chuan August 19, Thawhlehni khan a tlawh.

Tuivawl bialtu MLA Lalchhandama Ralte hi Sakawrdai VC House-ah YMA Inkhawmpui Lian Organising Committee hruaitute nen an inkâwm. MLA hian inkhawmpui lian atana hma a lak dan leh sorkar a dawr dan a sawi a; Organising Committee hruaitute chuan, hna hautak zual an zo tawh a, mikhual thlen dan tur an ruahman tawh thu an sawi.

Lalchhandama ralte hian Darlawna SAY Congress 2025 neih tura Organising Council nen Darlawn Venghlun VC House-ah an inkâwm bawk a; inkhawmpui a hlawhtlin theih nan theihtawp chhuahpui a tum thu a hrilh.

Salvation Army Youth Congress hi October 3-5, 2025 chhungin Darlawnah neih a ni dawn a, YMA Inkhawmpui Lian chu October 21-23, 2025 chhungin Sakawrdaiah neih a ni ang.

Tuivawl bialtu MLA hian a bial chhunga inkhawmpui lian pahnih thlenna tur panna kawng NH-150 Khawruhlian hnuaia bal, lirthei lian kal thei tura siam mek a enfiah bawk.