Revenue dept kan insiamṭha chho zel - B Lalchhanzova

Nimin khan Land revenue & Set-tlement (LRS) minister B Lalchhanzova pisaah Vaivakawna Venbuk ram land lease inhlanna hun hman a ni a; Minister chuan, LRS department an insiamṭhat chhoh zel thu a sawi.

Land lease inhlanna ram awmna bialtu MLA Lalnghinglova Hmar, minister-in a kaihruai a; B Lalchhanzova chuan, "Revenue department hi kan insiamṭha chho zel a, department chhungah monitoring mechanism kan duang. Land Revenue Rule Amendment-te pawh Assembly-a pharh turin kan inbuatsaih mek a ni," a ti.

Vaivakawn Venbuk ram chu kum eng emaw zat buaipui tawh a nih thu sawiin LRS Minister chuan, "Ram buai chinfel hi a hautak hle a, department leh mipuite kan ṭan rual chuan harsatnate hi awlsam zawkin a chinfel theih a ni tih vawiina land lease kan inhlan hian a tichiang hle," a ti a; bialtu MLA Lalnghinglova Hmar-in theihtawp a chhuah avangin Venbuk ram land lease chu Vaivakawn khawtlang kutah a awm thei ta tih a sawi.

Lalnghinglova Hmar pawhin thu sawiin, land lease inhlan chu Vaivakawn khawtlang tan mellung pawimawh a nih thu a sawi a, "Tuna ram kan tihfel tak hi khawtlang tan ro tling leh ṭangkai taka hman a nih theih nan khawtlang hruaitute leh kan hotute'n ngaihtuahna an seng chhunzawm zel dawn a, Aizawl luhna leh kawtchhuah lûn lai a nih avangin thianghlim leh felfai taka enkawl a ngai dawn a ni,” a ti.

Land lease inhlannaah hian Vaivakawn Local Council chairman kal chhuak R Zothanmawia'n ram chanchin leh hmalaknate a sawi a; LC chairman Lalchawimawia'n thu a sawi bawk.