CM hmalaknaa Mizo tan bik BSF 300 lak tur lawmawm kan ti - ZPM Ṭhalai

ZPM Ṭhalai chuan, chief minister Lalduhoma'n Union Home Minister a ngen angin, Mizo ṭhalaite tan bik BSF constable 300 lakna tur advertisement tihchhuah a ni ta leh, CM hmalakna tihhlawhtlin a ni dawn ta chu lawmawm an tih thu an tarlang.

ZPM ṭhalaite chuan thuchhuah siamin, "CM Pu Lalduhoma’n Home minister Amit Shah hnena ngenna a siam angin, special recruitment hmanga Mizo ṭhalaite tana BSF constatble (GD) 300 lakna tur advertisement tihchhuah a lo ni ta a. Mizorama schedule tribe khawsa nghette chanpual bik tur general duty post mipa 255 leh hmeichhia 45 lai kan CM hmalakna hmanga tihhlawhtlin a ni tur hi lawmawm kan ti tak zet a ni," an ti.

MHA-in kum 2023a Central Armed Police Force constable lak dan revised scheme (MHA UO No.45023/29/2021-PP/570) a siamah hmarchhak state hrang hrangin reserved vacancy an neih theih dan a tarlang tih sawiin ZPM Ṭhalai chuan, "Heng quota hnawhkhah lohte hi special recruitment hmanga hnawhkhah theih a ni a, he dan hi thiam takin kan CM Pu Lalduhoma'n hmang ṭangkaiin, Mizoramin kan quota la hnawhkhah lohte hnawhkhat turin Union Home Minister hnenah ngênna a siam a ni," an ti a; Mizoram ṭhalaite hna tur CM-in theihtawp chhuaha a ngaihtuah ṭhin chu fakawm an tih thu an tarlang.

ZPM Ṭhalai chuan, Mizo Territorial Army: Home and Heart din a ni dawn a, November 2025-ah post 70 lak a nih dawn thu leh a ṭul anga siam len zel tur a nih thu an tarlang a, "Mizoram ṭhalai leh leilung fate tan a ngaihtuahna seng tlattu CM Pu Lalduhoma kan nei hi a thlamuanthlak kan ti," an ti.